Internasjonale perspektiv på agendaen

Også den tredje arbeidsverkstaden i Shift-Plastics-prosjektet skapte gode diskusjonar. Foto: Julia Olsen

Den tredje arbeidsverkstaden i rekka i regi av Shift-Plastics fann stad i Oslo på seinhausten. Denne gongen var perspektivet internasjonalt.

I mai handla arbeidsverkstad nummer to om korleis vi kan innføre meir sirkulær handtering av plast innan fiskeri og akvakultur i Noreg. No var partnarar frå Danmark, Skottland og Canada invitert for å fortelje om situasjonen i deira heimland.

–Vi fekk høyre om utfordringar og moglegheiter som pregar plasthandteringa innan fiskeri- og akvakultur i deira kontekst, seier Megan Palmer-Abbs, nestleiar i Shfit-Plastics-prosjektet.

–  Etterpå snakka vi saman om korleis kunnskapen vi utviklar i dette prosjektet kan komme til nytte også utanfor Noregs grensar.

Modellen tek form

26 personar deltok på den fyrste av dagen av arbeidsverkstaden. Dag to var i regi av Christian Karl frå SINTEF og prosjektleiar Hans Jakob Walnum frå Vestlandsforsking. Her var berre sjølve kjernen i prosjektgruppa samla.  

– Fyrst fekk vi ein presentasjon frå Fredrik Moltu Johsen frå Vestlandsforsking, som snakke om designet av ein modell for livløpsvurdering av plast i fiskeri og akvakulturindustrien, fortel Palmer-Abbs.

– Så oppdaterte Paritosh Deshpande frå NTNU om korleis det går med analyse av materialflyt i sektoren, seier ho.

Madeleine Fisher, som har hospitert ved Vestlandsforsking hausten 2023 ved hjelp av eit utviklingsstipend, heldt ein presentasjon på workshopen. Madeleine studerer geografi og psykologi ved University of Northern British Columbia (UNBC) i Canada. Ho tok for seg korleis Canada handterer plast frå fiskeri og havbruk og kva dei gjer med plastforsøpling.

På rett veg

Samankoplingar mellom dei to tilnærmingane, kunnskapsutveksling, innsikt frå industrien og input frå andre ekspertar vil bli brukt for å bane veg for videre utvikling av modelleringa.

– Vi snakka om kva som skal bli neste steg i utviklinga av modellen og fekk input får ulike partnarar i prosjektet, seier Palmer-Abbs.

– Vi er på rett veg. Desse to dagane i Oslo var positive og matnyttige arbeidsdagar for prosjektet.